Sleep

झोप- छोटा मृत्यु, | स्वरूपा भेटणे

आणि परतणे । नव्या जन्मी..!

Thinking

विचारांच्या सीमा । विचारां कळती

परतून होती । ध्यानमग्न..!

Knowledge

असो मनाआड । भोवतीचे रान

आतले सामान । आवरावे..!

philosophy

सार्‍यांची उत्तरे । तत्त्वज्ञानापाशी

परंतू हाताशी । प्रतिबिंब..!

Jungles

गर्द वनराई । चैतन्याचा स्रोत

औषधांची साथ । नसताना..

Mountains

पर्वत पठारे । मोफत निवास

कोणाला धाडस । राहण्याचे?

Absolute

नित्य पूर्ण एक । अखंड निर्गुण

आपण सगुण । अंश त्याचे..!

Space

आकाश-पोकळी । एकच उपमा

ईश्वराच्या धामा । समर्पक..!

Wind

ईश्वरधाकाने । वायु, सूर्य भ्रमे

आपण का कर्मे । टाळावीत..?

Light

निबिड तमात । दिसता प्रकाश

यशाचे आकाश । येई हाती..!

Water

जलाशयापाशी । ध्यानाला बसावे

शल्य निरवावे । नादब्रह्मी..!

Earth

आदितत्त्व जरी । असे शून्याकार

पृथ्वीला आधार । अवकाश..!

Insects

जगावेसे काही । नाही जीवनात

सार सांगतात । कीटक हे..!

Germs

जीवसृष्टीतील । कीटक किटाणू

अणू परमाणू । चेतनाचे..!

Man, the miraculous seed

माणसाचे बीज । विस्मयकारक

उपजते एक । नवी व्यक्ती..!  

Reptiles

वारुळांचे घर । पवन प्राशिती

उडण्याची गती । नाही त्यांना..!

Birds

आकाश केवळ । वाट उड्डाणाची

सोय जगण्याची । धरेवर..!

Beasts

माणसापरास । म्हणे प्राणी बरे

साहतात सारे । सहजीच..!

Creations

विश्व साकारले । संकल्पामधून

तरंग होऊन । खेळणारे..!

Creator

कसा हा निर्माता । उधळतो मुक्त

स्वयंभू, अलिप्त । असूनही..!

Man is model of God

जीवसृष्टीमध्ये । प्रजाती अनेक

माणूस प्रतिक । ईश्वराचे..!

Life is a lantern

ऐल पैल तम । असीम अनंत

मधे चंद्रज्योत । आयुष्याची..!

Rebirth

महाभूते देती । देह मुक्त जीवा

नवा जन्म, नवा । कारावास..!

Between death and rebirth

मृत्यू ते जन्म हा । कामना-प्रवास

चालला सायास । देहासाठी..! 

Death

रिता रंगमंच । वाट पाहतोय

प्राण तिष्ठतोय । विंगेमध्ये..!