Liberation

मुक्तीच्या पायर्‍या । समोर दिसती

‘शब्दां’ची प्रचिती । येई जेव्हा..!

God guided world..

ईश-दिग्दर्शित । आखिव विश्वाला

परीक्षक भला । कोण हवा?

Subsistence

निर्वाहाची हमी । म्हणे देव घेतो

चोचीसवे देतो । दाणे सुद्धा..!

Without prompter...

बोलवित्याविना । सारे खोळांबेल

जागीच थांबेल । विश्वनाट्य..!

The perennial joy

दार वाजवाया । घाबरेल दुःख

तेव्हा नित्य सूख । प्रवेशेल..!

Until you merge..

‘मी’पण विरता । अंतर सरेल

केवळ उरेल । असणेच..! 

Sky is blue-

आभासी नीलिमा । दिसे आकाशात

जसे शरीरात । वसे मन..!

This active Universe

चराचर विश्व । नित्य नवा खेळ

संकल्प केवळ । ईश्वराचा..!

Moon

व्दितीयेची कोर । पूर्ण चंद्र होते

तेव्हाच दिसते । मोहक ती..!

Sun is visible God..

दिसणारा देव । एकमेव सूर्य

पण कोणा धैर्य । पाहण्याचे?..! 

On Foot if you go..

आतून निरिच्छ । त्यालाच लाभते

सारे जग घेते । डोक्यावर..!

Breath

कुणीतरी आत । नित्य श्वास घेते

श्रेय त्याला जाते । उड्डाणांचे..!

Individual

नाद गंध रूप । असो कोणतेही

ईश्वराची सही । सर्वावर..!

Duality

पार्थिवात बद्ध । पार्थिव दृष्टिला

व्दैताचीच लीला । दिसणार..!

Religions

विवेक-तरुंची । मुळे जरी भिन्न

एकच उद्यान । सर्वांसाठी..!

Clothing

नसे आवरण । अंतर्बाह्य मुक्त

आपण विमुक्त । का न व्हावे?

Food is scarce

प्रत्येकाला जर । हाव अनावर

दुष्काळाचा भार । पडणार..! 

Loneliness

कोलाहलमुक्त । एकांताच्या घरी

बोलावया हरी । अवतरे..!

High concentration

भान हरपेल । अशी एकाग्रता

मनाला पेलता । येत नाही..!

Craving for one thing..

अखंड ध्यासाला । वाट सापडते

यश सवे येते । चालताना..!

Inner voice

आतला आवाज । हाच खरा मित्र

असतो सर्वत्र । सोबतीला..!

Experience

जगताना रोज । धडे मिळतात

शिक्षक होतात । अनुभव..!

Anxiety

रिकाम्या मानाला ।  चिंता पोखरते

विस्कटून जाते । पाहणेच..!

Grief

पार्थिव आनंद । क्षणात विरतो

दुःख पांघरतो । दीर्घकाल..!

Book of Life

वरती आनंद । आत सारे दुःख

असे हे पुस्तक । जीवनाचे..!

Indebted we are born..

जन्मजात ऋणी । असतो आपण

तसेच मरण । ठरलेले..!

Morality

आदर्श झरती । सुमनांसारखे

फांदिलाच धोके । असतात..!

Evening

दिवस-रात्रीच्या । मध्यसीमेवर

सांध्य-हुरहुर । प्रस्थानाची..!

Sun

सूर्य ढाळी अश्रू । सावली पाहून

माध्यान्हीचे ऊन । झाकोळले..!

Son

मृत्यु येण्यापूर्वी । बीज उगवते

फिरत राहाते । जीव-चक्र..!  

When you reach Moon..

पोचा चंद्रावर । दुसरा दिसेल

दुरून हसेल । मिष्किलसा..!

Time

काळ एक मिती । अनादी अनंत

तरी मोजतात । दिस-मास..!

Penance

आत्मक्लेष एक । अटळ वेदना

तीच की साधना । कोणासाठी..!

Knock the door..

वाजवून पाहा । उघडेल दार

दिरंगाई फार । होऊ नये..!

पुन्हा वाजवाया । असेल नसेल

क्षीण नि मृदुल । जीवन हे..!

Path of Devotion

भक्तीमार्ग सदा । खुलाच असतो

भक्त देव होतो । पोचे तेव्हा..!

Real world

सत्यरूप विश्व । दृष्टिच्या पल्याड

पाहणे अल्याड । घोटाळते..!

Dependence

आधाराशिवाय । कसे उमगेल

स्वतंत्र्याचे मोल । सामर्थ्याला..!

Forbearance

मागणे न काही । फुलायचे फक्त

असायचे मुक्त । अंतर्बाह्य..!

Super conscious..

आत्मलीन स्थिती । पाहते स्वरूप

जणू विश्वरूप । पाहतेय..!

God is in action

कर्मयोग ‘त्याचा’ । अखंड चालला

सजग मनाला । आकळतो..!

Sleep

झोप- छोटा मृत्यु, | स्वरूपा भेटणे

आणि परतणे । नव्या जन्मी..!

Thinking

विचारांच्या सीमा । विचारां कळती

परतून होती । ध्यानमग्न..!

Knowledge

असो मनाआड । भोवतीचे रान

आतले सामान । आवरावे..!

philosophy

सार्‍यांची उत्तरे । तत्त्वज्ञानापाशी

परंतू हाताशी । प्रतिबिंब..!

Jungles

गर्द वनराई । चैतन्याचा स्रोत

औषधांची साथ । नसताना..

Mountains

पर्वत पठारे । मोफत निवास

कोणाला धाडस । राहण्याचे?

Absolute

नित्य पूर्ण एक । अखंड निर्गुण

आपण सगुण । अंश त्याचे..!

Space

आकाश-पोकळी । एकच उपमा

ईश्वराच्या धामा । समर्पक..!

Wind

ईश्वरधाकाने । वायु, सूर्य भ्रमे

आपण का कर्मे । टाळावीत..?

Light

निबिड तमात । दिसता प्रकाश

यशाचे आकाश । येई हाती..!